Интегрален дел на програмот HELIX е модулот за пресметка на плата, и истиот е вклучен во стандардните верзии на HELIX K и HELIX L едициите на програмот.
Стандардниот модул за пресметка на плата вклучува пресметка на плата од основна бруто плата. За дополнителниот модул за пресметка од нето може да прочитате на следниот линк.
За изготвување на пресметка на плата за вработени во една компанија, потребно е да се внесат повеќе податоци. Најпрво се внесуваат основните генералии на фирмата, во менито „Фирми“ – „Избор на фирма“, во табовите „Основни податоци“ и „Податоци за плата“ во формата за нова / промена на фирма.
Следниот чекор е внесување на вработените, преку формата која се повикува од „Фирми“ – „Плата“ – „Матични податоци за вработени“. За пример се внесени 4 вработени со шифри 001, 002, 003, 004, и на истите им е доделен различен стаж, по 1,2,3 односно 4 години соодветно (за пример на пресметка на „минат труд“).
Потоа се креира „Нов месец“ во пресметката („Фирми“ – „Плата“ – „Пресметка на плата“), со пополнување на актуелните вредности за дан. ослободување, просечна и минимална бруто плата, итн…, по што може да се изготвуваат и поединечните пресметки за секој од вработените со додавање на истите во креираниот месец.
Пресметка на плата со пријави и/или одјави на вработени
Доколку во текот на месецот има пријава на нови вработени или одјава на постоечки, во пресметката на плата задолжително мора да се внесат податоци кои ќе соодветствуваат со податоците кои компанијата ги доставува и до Агенцијата за вработување. Ова се однесува и на други промени во статусот на некое вработено лице (н.п. промена на статус од скратено работно време во полно работно време).
Подготовката на плата за лицата кои имаат промена на статусот, се изготвува на следниот начин:
- Се внесува бруто износот на договорената плата кои би се исплатил доколку лицето работи цел месец (во случајот тоа се 176 часа за месец 07/2021)
- Во делот за „Пријава/Одјава“ се менува изборот од „Цел месец“ во „Пријава“ или „Одјава“ соодветно, а потоа се избира датумот на настанување на самата промена, или во делот за „Скрат. раб. време“ се менува „Да“ или „Не“ соодветно ако станува збор за промена на статусот за скратено работно време.
- Во ставката за „Редовно работење“ рачно се менуваат часовите согласно претходните подесувања. При поставување на датум за пријава или одјава системот автоматски предлага колку часови треба да останатат во „Редовно работење“.
Во понатамошниот текст ќе видиме пример кога за едно лице има повеќе промени во ист месец.
Во примерот со лицето со шифра 001 ќе внесеме пријава на 05/07/2021 со скратено работно време, потоа ќе внесеме одјава на 15/07/2021 и повторна пријава на 16/07/2021 овој пат на полно работно време.
Првично го повикуваме вработениот со шифра 001, избираме „Скрат.раб.време“ – „Да“ и „Пријава/Одјава“ – „Пријава“, по што се внесува и датумот на пријава – 05/07/2021. Во моментот на избор на датум, системот предлага број на работни часови од избраниот датум до крајот на месецот (на полно раб. време, т.е. по 8 часови за секој ден). Но во случај кога лицето има пријава па одјава во ист месец, вкупните одработени часови треба да се внесат само еднаш, и тоа е препорачливо да се внесе кога ќе се внесува записот за одјавата. Затоа во овој случај во ставката за „Редовно работење“ се внесува 0 (нула) часови.
По внесување на записот за пријавата, вработениот 001 се повикува повторно (како „нов“ вработен) и притоа се внесува датумот на одјава – 15/07/2021. Системот повторно предлага број на часови кои би одговарале од почеток на месецот до избраниот датум, но во „Редовно работење“ треба да се внесе бројот на одработени часови од претходната пријава до одјавата. Значи, бидејќи од 05/07/2021 до 15/07/2021 има 9 работни дена, а лицето е на скратено работно време (4 часа дневно), во „Редовно работење“ треба да се внесе 36 часа.
Конечно вработениот 001 се повикува уште еднаш, се внесува пријава на 16/07/2021, при што системот предлага 88 часа до крај на месецот. Ова е вредноста на часови која треба да се внесе во „Редовно работење“.
Вака внесените три записи за вработениот 001 треба да продуцираат три реда во МПИН, како би можело да се испратат сите потребни информации до УЈП и истите да соодветствуваат со податоците во Агенцијата за Вработување.
Промена на износ на бруто плата во тек на месец
Доколку во текот на месецот има промена на износот на платата со интерно решение во рамки на компанијата, износот на плата за тој месец треба да соодветствува со пропорцијата на бројот на часови пред и по промената на износот.
Во матичните податоци за секој вработен може да биде внесен износот на договорена бруто плата. Тоа се прави во вториот таб во формата за нов/промена на вработен („Податоци за вработување“), во полето за бруто плата.
Во моментот на првично внесување на износ, како и при секоја следна промена на износот, системот прашува од кој датум почнува да важи внесената промена. Во случај на првично внесување на износ потребно е да се стави датум на првично вработување или постар датум, како системот уште во првиот месец на пресметка би го предлагал тој износ.
Во примерот кој следи за вработениот со шифра 002, ќе внесеме промена на бруто плата на 15/07/2021, од 50000 ден. на 60000 ден.
Ова подразбира дека 10 раб. дена од вкупни 22 во месецот на вработениот му се пресметува бруто плата од 50000 денари, а останатите 12 дена брутото е 60000 денари.
Вработениот со шифра 002 е внесен со вкупен стаж од 2 години 2 месеци и 2 дена, и за него минатиот труд ќе изнесува 2 * 0,5% = 1% од основната бруто плата.
Во внесениот пример, за месец 07/2021 треба да се добие износ од 56009 ден. бруто, со вклучен минат труд.
За да го провериме овој износ, ќе направиме табеларна пресметка:
Во пресметките секој поединечен износ се заокружува на цел број.
Очекуваниот износ се добива во пресметката во програмот, како што се гледа во прилогот.
