Од почетокот на 2021 година е воведена нова повластена тарифа за ДДВ од 10%, која се користи само за угостителски услуги. Истата е замена за досегашната општа тарифа од 18% за послужена храна и безалкохолни пијалоци. За алкохолни пијалаци и натаму се користи тарифата од 18%, а за спакувана храна за носење и натаму се користи повластената тарифа од 5% ДДВ.
Бидејќи оваа нова тарифа за ДДВ се користи само за субјекти кои се занимаваат со угостителство, имплементацијата на промените кај тие субјекти беше со највисок приоритет. Сепак промените треба да се имплементираат и кај другите субјекти, бидејќи се менуваат неколку законски обрасци за приказ на промети по даночни тарифи. За субјектите кои се занимаваат со малопродажба тоа пред сé однесува на Книгата на Дневни Финансиски Извештаи (КДФИ), а за сметководствата тоа е новата аконтативна ДДВ пријава, но ова ќе биде објаснето во друг текст кој е објавен во овој број на „Мој Информатор“.
Дефинирање на нова тарифа и доделување на артикли
Како би можела да се користи новата повластена тарифа од 10% истата мора прво да се дефинира во шифрарникот на даночни тарифи, а потоа соодветно да се додели и на производите за кои се однесува во шифрарникот на производи. Кај инсталациите на Helix програмот со вклучен модул за ресторанско работење, оваа промена се однесува на промена во тарифа 1, додека тарифа 2 (за носење) нема промени.
Дефинирање на даночна тарифа
Во шифрарникот на даночни тарифи треба да се дефинира нова тарифа, како на следниот пример. Шифрата е произволна, а во пропишана стапка (%) се внесува 10. Системот сам ја пополнува пресметаната (инверзната) стапка.
Доделување на даночна тарифа на производите
Новокреираната даночна тарифа треба да се додели на производите во шифрарникот на производи, со промена на секој производ засебно.
За да се олесни оваа промена, Зонел Софтвер овозможи нова опција за масовна промена на тарифа, на претходно селектирани производи. Опцијата се повикува од прегледот на шифрарникот на производи, од менито за „Специјални опции“.
Оваа опција е достапна со програмската верзија 7.11 на Helix програмот, која им следува на сите корисници со активен пакет на одржување со Зонел Софтвер.
Подесување на параметри за фискален апарат
Со законската измена бр. 96 на Helix програмот, во системските сетирања во табот Општо → Фискален апарат, достапни се сетирања на ознаки за тарифи кои се испраќаат од програмот кон фискалниот апарат. Во моментот кога фискалниот апарат ќе биде ажуриран со новите ознаки од страна на компаниите кои се овластени за истото, во Helix програмот треба соодветно да се прилагоди сетирањето.
Означувањето на даночните стапки во фискалните апарати се врши со алфа кодови А, Б, В и Г на следниот начин:
- ознака „А” за добра и услуги кои се оданочуваат со општа даночна стапка на данокот на додадена вредност (ДДВ);
- ознака „Б” за добра и услуги кои се оданочуваат со повластена даночна стапка на данокот на додадена вредност (ДДВ) од 5%;
- ознака „В” за добра и услуги кои се оданочуваат со повластена даночна стапка на данокот на додадена вредност (ДДВ) од 10% и
- ознака „Г” за добра и услуги кои се ослободени од данокот на додадена вредност (ДДВ) и за извршениот промет на добра и услуги од даночни обврзници кои не се регистрирани за целите на данокот на додадена вредност (ДДВ).
За да се завршат промените на фискалните апарати кои се користат со малопродажните објекти во сите компании, има пропишани рокови за имплементација на новите даночни ознаки. Ова е објавено во Службен Весник бр. 315/20 од 30.12.2020 година.
Книга на дневни финансиски извештаи (КДФИ)
Со законската измена бр. 97 на Helix програмот, при повикување на прегледот на КДФИ од трговската книга од малопродажба првин се појавува прашање за избор на образец, и по потврда за новиот образец од 2021 се отвара новиот образец со колоните за промет и данок од 10%. Пополнувањето од калкулациите е автоматско, а при рачен внес на дневен промет во трговската книга (кога не се евидентираат малопродажни калкулации) има нови редови за внес на продажни износи и ДДВ од 10%.
